مساحات القهر والحرية

اتعلمت إيه النهاردة؟ ١٧٦
من يومين سألتني صديقة: الواحد يعرف إزاي إنه مقهور؟
قلت لها متهيألي السؤال الأوقع مش مقهور ولا لأ، السؤال هو إذا كان المجتمع فيه قهر. كل مجتمع بيسمح بقهر بعض أفراده هو مجتمع قهر. الوجود في مجتمع القهر أشبه بالحياة داخل مقبرة، مش مهم أنت عايش ولا ميت، لأنك في حالة انتظار دائم للموت.
مش كل بنت بتتأذي علشان بنت، لكن كل بنت ممكن تتأذي علشان بنت، مش محتاجة تستنى يوم ما هتتلمس أو تتضرب أو تتحط على الهامش علشان تعتبر نفسها مقهورة، لأن الحياة في القبر أصلاً مش حياة.
مش كلنا ضحايا، لكن طالما فينا وفي وسطنا ضحايا، كلنا بشكل ما بنبقى مربوطين بخيوط القهر زي ما تكون شبكة عنكبوت، صحيح عايشين لكن مستنيين لحظة النهاية. خيوط العنكبوت هي الخوف والشك والطاعة واللوم والطمع والكراهية واليأس اللي بنتعلمه يوم بعد يوم.

النهاردة، صديقة تانية فكرتني: زي ما مافيش حد بيبقى مقهور لوحده، مافيش حد برضه بيتحرر لوحده. كلامنا، مشاركتنا، حبنا ودعمنا لبعض، محاولاتنا اليومية لكسر شبكة القهر حتى لو فردية بتدي أمل لناس ما نعرفهمش. في كل حكاية قهر، فيه مساحة مقاومة.
..
وأنت #اتعلمت إيه النهاردة؟
اتعلمت إيه النهاردة؟ – What I learnt today

اتعلمت إيه النهاردة؟ ١٧٦من يومين سألتني صديقة: الواحد يعرف إزاي إنه مقهور؟قلت لها متهيألي السؤال الأوقع مش مقهور ولا…

Posted by Hany Shoukry on Wednesday, 19 February 2014